lego logo

莫乃光 @ 就《修改香港特別行政區政長官產生辦法提出的議案》的發言 (2015.06.18)

2015-06-18

主席,特區政府說,我們離開普選一步之遙,是假話,反而,如果我們接受了這個假普選方案,我們就會完完全全地走向錯誤的方向,返唔到轉頭。

普選理念好簡單,除了一人一票的相同的投票權,還有平等和無不合理限制的提名權和被提名或者參選權,缺一不可,共產黨未當權時都係咁講嘅。

但人大8.31落閘,令到根本不可能在這個框架以下,達致普選的條件。提委會組成沿用選委會方式不變,雖然兩年多來社會上泛民甚至部分建制都提出了很多擴大提委會代表性的方案,特區政府和中央政府都視而不見,聽而不聞,反而賴泛民提出公民提名,話「浪費」了時間,不過,公民提名當時在社會的確係得到最多人的支持,並且,喂,人哋提出公民提名,你有認真同市民討論過嗎?政府一句唔合基本法就無理會過公民提名的要求啦,浪費了你們什麼時間? 公民提名以外,其他擴大提委會的方案,你理都唔理,咁就真係被你浪費了!到頭來,最後,政府又一句無時候,竟然可以將討論擴大提委會代表性置之不理。

另外,8.31框架三個條件,互相緊扣,不是你擴充提委會就夠的,半數出閘這個限制就最明顯啦,就算是2-3名候選人這限制,其實都非常之咁辣,數學上可以達到完全操控。所以,8.31框架一出,普選已經被人大判了死刑。

有篩選就係有篩選,最好的例子,就係我一個面書朋友放上網上面的一段片,他收到一個所謂電話民調,佢拍低咗,系統問他有三個候選人會選邊一個,㩒一號係梁振英、二號係葉劉淑儀,三號係梁錦松,咁我朋友三個都唔鐘意,㩒四號,個電話系統話這不是有效選擇,佢再㩒多次,cut咗佢線。依啲咪係有篩選囉!

即使在我們反對嘅8.31框架限制前題下,我們一直都希望有機會討論,談判,即使雙方立場距離遠,但傾好過唔傾,但特區政府一直玩拉布,浪費時間,直到最後。我還記得一月廿一日會見政務司司長,席上要求同中央對話,之後一月廿七日見過政制及內地事務局局長,重申要求,當時仲以為,過完年左右有機會卦,結果,到四月十五日,政府宣佈第二階段諮詢結果方案前一星期,才有機會同政務司司長再見面,已經唔使傾啦,同8.31框架處理方法一樣,定死哂,同你講聲咋。到五月卅一日先同中央官員見面,其實已經無任何討論空間,講「浪費」,這裡都浪費了四個幾月呀,期間完全無接觸㗎,定係,拉布到無時間,迫我們就範,才是政府原來的戲本?

全文: http://charlesmok.blogspot.hk/2015/06/blog-post_18.html

Office Of Hon. Charles Mok, Legislative Councillor (IT)