lego logo

莫乃光 @ 就《捍衛編輯採訪獨立自主》議員議案的發言 (2014.01.22)

2014-01-23

主席:非常感謝梁家傑議員提出這個議案。香港的新聞自由和編輯自主近年已經被蠶食到前所未有的程度,打壓傳媒方法之多,力度之大,越來越明顯,用特區政府嘅套語,就夠晒『多管齊下』、『全方位』。

關於新聞自由的議案其實我們已經辯論過很多次。去年六月我曾經動議「捍衛資訊、新聞及網絡自由」議案,更獲得全票通過。當時可能無這麼大壓力,但今晚睇吓點。事到如今,打壓傳媒之手已經不再在背後發功,而是主動出擊,一招比一招重,唔聽話嘅傳媒一一被『整頓』。

報紙高層遙控施壓要編輯抽稿、改評論文章敏感詞;寫評論的收律師信,唔聽話就要老闆出手換走總編輯,唔係就搵人燒報紙、打爆汽車玻璃、擺把刀係你屋企門口嚇下你,如果唔係就街頭打人;呢D方法都唔夠終極一招:叫廣告客戶抽廣告封殺,陰乾你份報紙,等佢『自然』死亡;

香港好似就快變成只能夠容納一種聲音嘅一言堂,咁係咪就係CY講嘅『齊心香港營』?電台名嘴太辛辣就要高層『收拾』,踢走嘅踢走,踢唔走就調走,唔俾你做烽煙節目;頭條新聞太串就擺去殭屍電視台播;電視節目訪問得直接得濟,就寫信投訴主持人;總之,成個新聞界由上至下都逐漸感受到無形之手越鏈越緊,步步進逼。

新聞媒體嘅編輯自主大受各方打壓,網上新聞媒體就趁機遍地開花,係香港呢個已經被河蟹的傳媒以外,為市民提供一般新聞唔會見到嘅獨立報導,不一樣嘅聲音。不過,想係主流傳媒以外做新聞嘅都唔容易,所以我尤其同意涂謹申議員修正案第一點中的『公平對待各傳媒機構,以及保障新聞工作者的採訪安全』。

《聯合國公民權利和政治權利國際公約》第19條訂明人人有權同自由去傳播訊息。聯合國人權事務委員會亦指應重視和鼓勵獨立和多元媒體。局長一陣又會念口黃咁話『特區政府堅決維護新聞自由和言論自由,人人都可以發表意見』,但係講一套做一套,一面高調話用新媒體宣傳政改,同市民互動,但鏡頭一轉新聞處就暗啞底打壓網媒唔俾佢地採訪,完全係精神分裂,雙重標準。

但不少網媒都表示政府對網上媒體採訪的規限不停收緊,他們的記者在前線經常受到騷擾。琴日我同一班網上媒體朋友見記者,佢地好多都試過採訪官方活動時俾政府新聞處留難,原因次次唔同,唔係話場地唔夠位,就話佢地唔係主流傳媒,總之就用盡任何藉口遊花園,唔俾佢地採訪。

今早在口頭質詢,我不可以提出議論,現在我講些個案例子:獨立媒體曾多次被政府拒絕入場採訪,包括地方行政高峰會、人口政策諮詢論壇。有一次陳茂波局長到北區諮詢,記者雖然可以入採訪區,但就被「指令」不得發問。在社運場合前線報導的社會記錄協會SocRec同USP社媒經常在毫無解釋的情況下被警察當做示威者,例如特首去觀塘落區諮詢時不斷被阻撓和驅趕;天樂媒體就被政府總部因為非註冊的主流媒體而拒絕發出記者證。

因為網媒冇註冊所以唔俾入已經夠唔合理啦,熱血時報話原來一年前已經同政府註冊左,都仲冇得採訪。我想問,究竟政府係用咩準則決定邊啲傳媒可以採訪呢?係咪所有網媒都係黑名單上?這是什麼?又是篩選!

主流傳媒係做新聞,網上傳媒又係做新聞。新聞處嘅責任係幫政府同市民溝通,網上新聞媒體好多都係義工或者兼職形式運作,報導市民關心嘅政府消息。我唔明點解新聞處偏偏好似針對佢地咁,鐵板一塊話唔係主流傳媒就唔俾採訪,甚至連採訪通知都唔俾佢地收,話系統容量唔夠喎,加一個用戶戶口有幾難?呢啲藉口真係離晒大譜。

政府對我質詢的回答亦九唔搭八,講到好似有既定政策,但執行就閃閃缩缩。話有網上發布新聞稿、直播記者會、RSS Feed諸如此類。但你可唔可以望住條live feed問官員問題?政府應該搞清楚,做新聞係雙向的,網上發放資訊同記者去現場發問同採訪,完全係兩件事…… (未完)

全文: http://charlesmok.blogspot.hk/

Office Of Hon. Charles Mok, Legislative Councillor (IT)