lego logo
【發言稿】莫乃光就『改善公務員待遇,提升施政效率及推動創意與創新』議案發言 (2019-06-05)
2019-06-05

 

多謝謝偉銓議員提出今日議案,令我地可以討論提升公共決策同行政的現有問題,如何裝備我地的公務員去應對時代進步、科技發展帶來的改變。當然前提是,由市民和用家角度出發,提高公共服務的質素,著重效率和創新,包括摒棄唔再合適的管理方式,令我們的公務員可以將精力放在真正重要的地方,提供以人為本的服務。


講起公共行政效率,切身的例子就是派錢4000蚊亂局,好多市民到今日都收唔到。財爺話職津辦日均處理1.6萬個案,希望年底可以派完,到現在340萬申請,只係派了11萬宗,最後派錢的行政費用要幾多?如果用簡單D方法去做,可能政府慳咗錢,仲可以派返俾市民。議辦同事話整張網上form上網填,資訊保安保障到咪得囉。張建宗話開發網上交表系統的額外功能需時18個月,吓?


政府幾年來大灑千億推動創新科技,資助計劃一個又一個,又說跨部門協調應用科技,今次卻變成互相推卸、#呢單野唔係我跟開、多一事不如少一事,寧願方便部門也不以方便市民為先,其實前線公務員好慘,因為#我都係照佢意思去做。你又話要智慧城市,咁簡單一件事都做到咁。政府內部繼續官僚守舊,點同人講創新同效率?


政府唱好香港科技如何「先進」,市民日常體會到的卻是申請社會福利要到不同部門處理繁瑣程序。要到幾時我地香港人先可以享受互聯網時代一個國際級城市應有的公共服務水平?


派4000蚊搞到一鑊粥咁,然後高官就話整網上申請系統要搞18個月所以人手好過啦!18個月有幾多係走程序、有幾多實際用來開發?招標寫個項目規格已經要大半年,招標又搞幾個月,隨時逼承辦商用最少時間交貨。問題正正反映因為政府大量把資訊科技項目外判,以致政府內部未能進行快速的系統開發工作。


今次4000元的事件,顯示香港要真正成為「智慧城市」最大挑戰不在資源、也不是技術。政府數碼轉型須從心態和制度開始,並讓公務員團隊學習應用科技改善和簡化行政程序的思維。

 

數碼轉型不應只是把現有服務電子化或開發新功能和服務,更重要的是令科技思維貫徹不同階層和部門。最起碼不應每次政府推出新的資助計劃,都要重新開發一個專用系統、重新招標和開發一次,然後市民去每個部門都要重新輸入資料。

當香港不少政府網上服務仍要求JAVA外掛,新加坡已在幾年前開始逐步進行數碼政府革新,例如數碼政府藍圖,目標包括整合各種政府服務以符合國民和企業的需要,例如分別在2016與2017年為企業提供網上一站式申請各類許可執照及各種政府資助計劃的平台,縮短企業申請許可和補助的時間及成本。

 

如何應對社會對公共服務的期望轉變,推出更符合用家需求的公共服務?新加坡政府科技局透過開發共用數碼工具集,能更快、更低成本地推出方便國民的「Moments of Life」應用,從用家需求出發整合政府服務資訊,例如養育幼兒的家庭所需的服務。該部門也設立用戶體驗研究實驗室,幫助政府部門測試推出的流動應用和網站,透過測試和收集用戶互動方式數據改善服務。

 

香港公務員的數碼能力培育亦與時代脫節,必須針對科技年代所需加以改善。新加坡政府計劃在2023年前完成對20000名公務員的數據科學培訓,提供智慧國獎學金以培育青年ICT工程人才。


另一個問題是政府如何吸引IT人才加入?繼續將資訊科技員工外判,唔俾返應有的專業地位同待遇IT人,政府吸引唔到叻人入黎幫手,點推動數碼轉型同智慧城市?

 

我講左好多年的T-con待遇問題,就係究竟政府幾時停止將T合約員工用完即棄?T合約對前線IT人唔公平既問題我已經講左好多年,亦都做過幾次意見調查將佢地既訴求話俾政府知,但政府聽 D 唔聽 D,令人失望。雖然政府開多左IT位,但仍然有好多係T合約,問題仍然存在,少修少補無解決問題。

 

吸引人才,亦要加強培訓公務員。我在修正案中提及參考參考海外地區如英國及新加坡等,為前線公務員提供數據分析及科學、人工智能、用戶為本設計、敏捷開發等課程,以便有系統地培訓公務員在運用創新科技方面的能力。香港政府裡面有幾多官員認識呢D概念,而唔係淨係乜都走去整個APP交差?

 

英國的Government Digital Service有GDS Academy,設立了一個叫Data Science Accelerator的計劃,跨部門專門促進政府內部應用數據科學推動創新;另一個計劃,為政府內的技術人員度身訂造10個星期的課程,等佢地可以有機會深入認識新科技,例如AI、生物科技、區塊鏈等等。


香港政府推動智慧城市應把科技和設計為先的思維注入內部架構、為員工提供培訓和所需工具,否則繼續以「不變應萬變」,只會重複派4000元亂局的笑話。

Office Of Hon. Charles Mok, Legislative Councillor (IT)