lego logo
【發言稿】莫乃光就『落實多元教育 紓緩學生及家長壓力』議案發言
2019-01-31

*發言稿與真實發言內容有出入

 

主席,多謝李慧琼議員提出『落實多元教育 紓緩學生及家長壓力』議案

 

睇翻近來既國際人才競爭力排名,先有上年由瑞士洛桑管理學院發表既「2018年世界人才報告」,新加坡在63個國家或地區中排名13,超越香港成為亞洲第一。香港的排名由去年的12位下跌至第18位,「投資與發展人才」、「吸引與留住人才」及「人才準備度」三大評分指標排名全部下跌

 

上個禮拜就有機構就發表2019全球人才競爭力指數,以城市計,香港只排係第27位,排名低過首爾、台北、新加坡和東京

 

以上既指數,香港唔係排名下跌,就係輸比區內競爭對手,反映左我地係人才培育上係有問題,係急需改善

 

當然導致排名落後既原因好多,例如我地多唔多創業人才。岩岩提到既2019年全球人才競爭力指數就將創業人才為一個評分因素,排名最高既國家同城市,係創業人才同埋營造創業環境上,領先其他城市

 

其實香港科技人才不足既問題,我講左好多年,e個問題亦都係其中一個重要既原因點解香港創科發展無乜突破

 

我提交好多政策建議俾政府,例如加強進修資助,加強推動數碼技能培訓等,改革STEM教育亦都講左好多年

 

今日就住e個議案同我既修正案,我想講下係基礎教育方面點樣可以加強到學生既數碼技能,提升競爭力

 

政府成日係咁講話『STEM教育並唔係獨立既新科目,係中、小學課程中,都已經有教STEM架啦』,但學既同考既係咪有用,係咪跟得上科技發展/ 市場所需,教學支援足唔足夠?

 

課程需要改革

 

現時教育局以課外活動式推動STEM活動,只能提高學生的認知和興趣,但本地科技人才斷層問題在於學制和考試升學制度

 

有大學教授同我反映話學生既數理根柢不夠扎實,需要花額外時間「補習」

 

其實係 DSE 選修科目既層面已有「重文輕理」既情況,因為4科必修科當中,有兩科語文科與屬文科的通識,數學只佔4科之一,而高階數學只是數學科延伸課程,令高中生的數學或科學根基比以前更弱

 

港科院2017年既報告,就指出香港中學生修讀高等數學的人數明顯下滑,與世界不少地區相比屬於偏低,令人憂慮。近年較少香港學生同時修讀物理、生物、化學三科理科,高中生在理科跨學科知識嚴重不足,加上缺乏高階數學基礎,令香港學生在STEM的發展先天不足

 

報告亦都指美國、歐洲、日本及韓國都張科學列為必修科,相比之下,香港STEM教育並不普及。另外,高等數學科修讀率低,比率僅14%,遠遠落後於日本、韓國及台灣的57至80%

 

大家都知,通常有能力既學生對在大學攻讀工程和數理科目興趣比專業學科和商科低

 

睇翻2018 DSE 數據,『資訊及通訊科技』只係有5567個學生考,佔總考生唔夠10%

 

當然有部分原因係在於IT以致創科係香港既發展吸唔吸引到學生去投入去做,咁e個關乎政府政策既問題,關乎於推動創科發展成唔成功,我今日唔講住

 

其實如果睇下其他國家係由以咩策略去推動STEM教育,就可以發現點解香港既STEM教育會搞成咁

 

人地外國政府,例如美國、英國,係將STEM視為係推動國家發展,提升競爭力既項目,香港政府就視為普通教育,興趣班咁,無訂任何目標

 

美國政府岩岩去年尾(上個月)發表『推動STEM教育既未來5年計劃』,其中一個目標係將學生打造成未來從事STEM工作既人才(”Prepare the STEM Workforce for the Future”)

 

人地係有清晰目標去做,例如:

100Kin10 計劃:目標係係2021年培訓 100,000 STEM 教師

US2020 計劃:將從事STEM工作既專家同學生進行配對,為學生提供『導師計劃』(    mentoring),教授學生實用既STEM知識(facilitate hands-on STEM learning experiences)

 

英國政府亦都大力投放資源去培訓教師進行資訊科技既教學,例如上年就有兩筆撥款:

£8400萬英鎊去為資訊科技教師進行培訓

£7800萬英鎊資助一間初創企業去培訓40000個老師進行電腦教學

 

可以睇到人地政府係有目標,係有策略去做,香港係無

 

配套不足

 

講完課程,係教學配套上,政府既工作同資源足唔足夠呢?

 

現時政府每年提供資訊科技綜合津貼俾學校,而2019至2020學年起,計劃向公營及直資學校發放每年9億元既學習津貼,推展STEM教育

 

但係咪俾左錢就解決左問題?

 

教育局每年花費幾億公帑推行《第四個資訊科技教育策略》,審計署上年10月就批評管理不善、無監察成效、對學校配套不足

 

審計署發現好多學校還沒有用盡資訊科技綜合津貼撥款。在2016/17財政年度,政府合共向907所學校發放3.52億元資訊津貼;截至2016/17年度的多年期間,每年均獲發資訊科技綜合津貼的約900所公營學校中,過半學校沒有用盡津貼撥款,而且約一成半未動用兩成以上的津貼撥款

 

雖然的確係有唔少學校話唔夠錢推展電子學習,尤其係聘請技術支援人員

 

但問題明顯就係有D學校就唔夠錢駛,有D學校就唔係好用,資源唔平衡,有無監察!

教育局係需要重新思考點樣促進資源運用同設立監察機制,需要加強問責性和透明度

 

對基層學童支援不足

 

自從「上網學習支援計劃」2018年8月31日完結,政府透過關愛基金於2018/19學年起推行援助項目,為期三年,資助推行學生「自攜裝置」學校既有需要學生購買流動電腦裝置

 

 

我上年審核財政預算案既時候就問政府有幾多學校推行「自攜裝置」,答案係只有約15%中學及小學有參與!

 

 

關注學童發展權利聯席上年9月發表調查報告:

 

1)超過兩成基層兒童屋企係無『可以連接至互聯網既電腦』

2)三成四基層兒童屋企既電腦質素差,出現電腦慢同網速慢既問題

3)而「自攜裝置」計劃既資助就預計只可以令約三成既基層學生受惠

 

可以見到現時政府對基層學生既支援嚴重不足,甚至係倒退!

 

紓緩學生及家長壓力

 

主席,我今日既發言同修正案雖然強調改革STEM教育同加強配套,但係我亦都支持原議案提到紓緩學生及家長壓力

 

新加坡政府上年推出新措施,目標係減少考試,減少看重分數

 

措施包括今年起,取消小二生的年底考試,以及小一和小二的所有計分評估。另外,教育部也將從今年起率先取消中一生的年中考試,並在2021年底前,逐步廢除小三、小五和中三的年中考試

 

反觀香港我地講左咁耐話要取消TSA都唔得

 

不得不提今朝係口頭質詢時段,葉建源議員問有關TSA考生數字,教育局竟然唔俾!係非常離譜,我係強烈譴責

Office Of Hon. Charles Mok, Legislative Councillor (IT)